پاکستان د «پي آی اې» هوايي شرکت د خرڅلاو پلان تصویب کړ
۱۴۰۲ بهمن ۱۸, چهارشنبه
د پاکستان د ملي هوايي الوتکو د خرڅلاو له پاره د کابینې له خوا منظوریدل یو اړین شرط دی.
رویټرز خبري آژانس تیره اونۍ راپور ورکړ، چې لنډمهاله حکومت په دې وروستیو کې د دغه هوایي شرکت د خرڅلاو وروستی پلان جوړ کړی دی.
د لومړي وزیر دفتر په یوه خبر پاڼه کې ویلي: «دا ګامونه به د پي آی آې هوایي شرکت له پاره د پانګوالو په راجلبولو کې مرسته وکړي.» په خبر پاڼه کې راغلي دي چې د « Ernst & Young» په نوم د مشورو یوه شرکت د دغه زیان لیدونکي شرکت د بیا رغونې له پاره خپله طرحه بشپړه کړې.
په دې خبرپاڼه کې د ټاکنو کمېسیون د لارښوونو یادونه نه ده شوې. خو لنډمهالي لومړي وزير انوارالحق کاکړ تر دې وړاندې ويلي و، چې دغه پروسه به د کابينې تر تصويب وروسته د خرڅلاو په ګډون د نورو اجرااتو له پاره راتلونکي حکومت ته وسپارل شي.
دا پلان هغه اقتصادي ننګونې په ګوته کوي چې د پاکستان راتلونکی حکومت به د پیسو د نړیوال صندوق له خوا وضع شويو سختو شرایطو سره مخ شي. پاکستان چې ۲۴۱ میلیونه نفوس لري د انفلاسیون له لوړې کچې سره مخامخ دی.
د پاکستان موقتې کابینې دغه منصوبه د خصوصي چارو کمېسیون په لارښوونه تائید کړې.
دغه کمېسیون ته دنده ورکړل شوې چې ټول زیان لیدونکي دولتي شرکتونه وپلوري.
«PIA» شرکت د تېر کال د جون تر میاشتې پورې ۷۸۵ میلیارده پاکستانۍ کلدارې (۲.۸ میلیارده ډالره) پوروړی دی او ټولټال زیان یې تر تیرې جون میاشتې پورې ۷۱۳ میلیارده روپۍ (۲.۵۵ میلیارده ډالره) وه.